Majalisar Zartarwar Jihar Kano ta amince da kashe jimillar Naira biliyan 144 da miliyan 5 domin aiwatar da ayyukan raya jihar a fannoni daban-daban.
An amince da kudaden ne yayin taron majalisar karo na 41, wanda aka gudanar ranar Alhamis, 24 ga Satumba, 2026, a Malam Aminu Kano House da ke Asokoro, Abuja, ƙarƙashin jagorancin Gwamnan Jihar Kano, Engr. Abba Kabir Yusuf.
Kwamishinan Yaɗa Labarai da Harkokin Cikin Gida na jihar, Dr. Ibrahim Abdullahi Waiya, ne ya bayyana hakan yayin taron manema labarai da aka gudanar a Kano.
Ya bayyana cewa kudaden za a karkata su ne zuwa muhimman fannoni da suka haɗa da gina da gyaran hanyoyi, ilimi, kiwon lafiya, samar da ruwa da makamashi, gidaje da sauran ayyukan more rayuwa.
Ma’aikatar Ayyuka ce ta samu kaso mafi yawa daga cikin kudaden, inda aka ware mata sama da Naira biliyan 84 da miliyan 975 domin aiwatar da ayyukan hanyoyi da gine-ginen gwamnati.
Daga cikin ayyukan hanyoyin da aka amince da su akwai Rawul–Gani–Sitti–Masu–Gomo Road a ƙaramar hukumar Sumaila, Zaria Road–Gurjiya–Yankatsari–Rijiyar Gwangwan, da Dawakin Kudu–Lahadin Makole Road.
Haka kuma, akwai wasu ayyukan hanyoyi a yankunan Nassarawa GRA, Tarauni, Kumbotso da Janbulo, waɗanda za su kasance cikin ayyukan da za a aiwatar.
A bangaren ilimi, majalisar ta amince da ware sama da Naira biliyan 14 da miliyan 276, domin gudanar da ayyukan da suka shafi bunƙasa harkar ilimi a jihar.
Bangaren kiwon lafiya kuwa ya samu sama da Naira biliyan 2 da miliyan 608, waɗanda za a yi amfani da su wajen gyaran cibiyoyin lafiya da inganta ayyukan asibitoci.
Haka kuma, an amince da ware sama da Naira biliyan 11 ga Ma’aikatar Filaye da Tsare-tsaren Birane domin wasu muhimman ayyuka, ciki har da samar da kayayyakin kula da zirga-zirga da inganta ababen more rayuwa.
A wani mataki daban, majalisar ta amince da kwaryakwaryar kasafin kudin na shekarar 2026 na Naira tiriliyan 1 da biliyan 201.
Majalisar ta kuma umarci a tura kudirin kasafin kudin kari zuwa Majalisar Dokokin Jihar Kano, domin ta yi nazari a kansa tare da daukar matakin da ya dace.
Baya ga haka, majalisar ta amince da gudanar da Kano Art and Cultural Festival, KANFEST 2026, wanda aka tsara domin bunkasa al’adu da harkokin fasaha a jihar.
Haka kuma, an amince da shirin hadin gwiwa tsakanin gwamnati da masu zaman kansu domin bunkasa Kano Energy and SME Industrial Park da ke Tamburawa, wanda aka tsara domin tallafa wa kananan da matsakaitan masana’antu da bunkasa harkokin tattalin arziki.
A yayin taron, majalisar ta kuma umarci Ma’aikatar Ayyuka da ta duba yanayin hanyar da ta taso daga Eastern Bypass zuwa Tsamiya Babba, Larabawar Abasawa da Nera Roundabout, domin tantance yiwuwar gyaranta.
Majalisar ta ce matakan na daga cikin shirye-shiryen gwamnatin jihar na inganta ababen more rayuwa, bunkasa tattalin arziki da samar da ayyukan da za su amfani al’ummar Kano.
Taron ya gudana ne ƙarƙashin jagorancin Gwamna Abba Kabir Yusuf, inda aka tattauna batutuwa daban-daban da suka shafi ci gaban jihar da jin dadin al’ummar Kano.