Kamfanin Nestlé Milo ya tallafa wa matasa masu sana’ar sayar da shayi 2,000 a Kano da Jos, a wani shiri da aka ƙaddamar domin ƙarfafa ƙananan ‘yan kasuwa da kuma taimaka musu wajen bunƙasa sana’o’insu.
Tallafin ya ƙunshi kayayyakin aiki daban-daban da suka haɗa da risho mai amfani da iskar gas, tukunyar gas, malafar kare rana, fitila mai amfani da hasken rana, kofuna da kuma sinadarin Milo.
Kamfanin ya bayyana cewa shirin wani ɓangare ne na ƙoƙarinsa na ƙarfafa hulɗa da abokan cinikinsa tare da tallafa wa masu ƙananan sana’o’i, musamman masu sayar da shayi waɗanda ke taka muhimmiyar rawa wajen samar da karin kumallo ga jama’a a Arewacin Najeriya.
Da yake jawabi a wajen taron da aka gudanar a Kano, wakilin Nestlé Milo a Najeriya, Gilbert Tweneboah-Koduah, ya ce tallafin ya nuna yadda kamfanin ke son ci gaba da kasancewa cikin al’umma tare da tallafa wa waɗanda ke taka muhimmiyar rawa a rayuwar yau da kullum.
Ya ce masu sana’ar shayi sun zama wani muhimmin ɓangare na al’adar Arewacin Najeriya, inda mutane da dama ke dogaro da su wajen samun karin kumallo.
A cewarsa, shirin ya fara ne a bara da masu sana’ar shayi 400, amma yanzu an faɗaɗa shi zuwa masu sana’a 2,000 a Kano, Jos, Kaduna da Maiduguri, yayin da kamfanin ke shirin ƙara yaɗa shirin zuwa sauran sassan Arewacin Najeriya.
“Masu shayi sun zama wani muhimmin ɓangare na al’adar Arewacin Najeriya, inda jama’a da dama ke dogaro da su wajen karin kumallo”In ji shi
Milo na son kasancewa jigo a wannan al’ada tare da tallafa wa masu shayi domin su bunƙasa kasuwancinsu,” in ji shi.
Shugaban Ƙungiyar Masu Sayar da Shayi ta Jihar Kano, Usman Muhammad Usman, ya yaba wa Nestlé Milo bisa tallafin, yana mai cewa ya shafe shekaru 36 yana sana’ar shayi kuma Milo na daga cikin kayayyakin da ya daɗe yana hulɗa da su.
Ya ce kayan aikin da aka raba musu za su taimaka wajen sauƙaƙa harkokin sana’arsu da kuma ƙara inganta hidimar da suke yi wa kwastomominsu.
Shi ma wani mai sana’ar shayi a Jos, Musa Ibrahim, ya bayyana farin cikinsa da tallafin, yana mai cewa masu sana’ar shayi sun ji daɗin yadda kamfanin ya kula da su.
Ya kuma yi kira ga sauran kamfanonin da ke samar da kayayyakin da masu sana’ar shayi ke amfani da su da su yi koyi da Nestlé Milo wajen tallafa wa abokan hulɗarsu.
A nata jawabin, Jakadiyar Milo kuma fitacciyar jarumar fina-finan Hausa, Mansura Isa, ta ce kamfanin ya daɗe yana gudanar da ayyukan tallafa wa al’umma ta hanyoyi daban-daban.
Ita ma wani jakadan Milo kuma jarumin fina-finan Hausa, Sulaiman Yahaya, wanda aka fi sani da Bosho, ya jaddada muhimmancin amfani da albarkatun cikin gida wajen samar da kayayyakin kamfanin, yana mai cewa hakan na taimakawa wajen tallafa wa manoma da sauran masu ruwa da tsaki a cikin gida.
Nestlé Milo ya ce zai ci gaba da faɗaɗa shirin domin ƙarin masu sana’ar shayi a Arewacin Najeriya su samu kayan aikin da za su taimaka musu wajen bunƙasa sana’o’insu, inganta hidimarsu ga kwastomomi da kuma ƙara samun damar dogaro da kansu.