Limamin Masallacin Juma’a na Usman Bn Affan da ke unguwar Gadon Kaya, cikin ƙaramar hukumar Gwale ta jihar Kano, Dr. Abdallah Usman Gadon Kaya, ya yi bayani kan babban matsayi da darajar Annabi Muhammadu SAW, yana mai cewa babu wani mutum da ya kai Manzon Allah daraja da ɗaukaka a duniya.
Dr. Abdallah ya bayyana hakan ne a yayin hudubar Juma’a da ya gabatar a masallacin, inda ya yi bayani kan matsayin Annabi SAW, muhimmancin sanin darajarsa da kuma wajabcin bin abin da ya zo da shi da kuma koyi da shi.
Malamin ya ce Allah ne ya zaɓi Annabi Muhammadu SAW domin ya zama Manzonsa na ƙarshe, ya isar da saƙon Allah ga ɗaukacin bil’adama, tare da bayyana musu yadda za su gudanar da rayuwarsu bisa koyarwar addini.
Ya jaddada cewa Annabi Muhammadu SAW ya kammala isar da saƙon da aka aiko shi da shi ga al’umma kafin ya bar duniya, bai ɓoye wani abu daga cikin abin da aka umarce shi da isarwa ba.
Dr. Gadon Kaya yace wannan ita ce akidar Ahalussunnah kuma babu wadanda suka kaisu son Annabi da kiyaye abinda yazo da shi.
Dr. Abdallah ya ce babu wani abu a cikin addini da ya rage wanda Annabi SAW bai isar ba, yana mai cewa wannan na daga cikin akidar Ahlussunnah da basa kari kuma basa ragi.
A yayin bayyana irin girman matsayin Annabi , malamin ya kawo misali da cewa idan Annabi Muhammadu SAW ya kira mutum alhali yana cikin sallah, wajibi ne mutum ya amsa kiran Annabi , sannan ya koma ya ci gaba da sallarsa daga inda ya tsaya ba tare da ta lalace ba.
Ya danganta wannan da irin girman matsayi da ikon umarnin Annabi Muhammadu SAW a kan muminai, yana mai jaddada cewa umarninsa da koyarwarsa suna da muhimmiyar rawa a rayuwar Musulmi.
Malamin ya kuma ce Annabi SAW shi ne Manzon Allah na ƙarshe, kuma saƙon da ya zo da shi ya shafi ɗaukacin bil’adama.
Ya bayyana cewa Annabi Muhammadu SAW ya kasance mai gaskiya da amana tun kafin a ba shi annabta, har mutanen Makka suka san shi da suna Al-Amin.
Dr. Abdallah ya ƙara da cewa Annabi SAW ya kasance mai tausayi da kyakkyawar mu’amala, yana kula da marasa ƙarfi,da iyalansa da abokansa da na kasa da marasa karfi ga kuma taimakon mabukata da kuma yafewa masu kuskure.
Ya ce rayuwar Annabi SAW cike take da misalan haƙuri, juriya, adalci, gaskiya da tausayi, yana mai cewa waɗannan halaye ya kamata Musulmi su yi ƙoƙarin kwaikwayonsu.
“Shine wanda baya taba cin sadaka Amma yana karbar kyauta”.
Malamin ya bayyana cewa Annabi Muhammadu SAW ya fuskanci ƙalubale da wahalhalu masu yawa wajen isar da saƙon Allah, amma bai yi kasa a gwiwa ba har sai da ya kammala amanar da aka ɗora masa.
Ya kuma jaddada cewa soyayyar Annabi SAW ba ta tsaya ga furuci kawai ba, domin a aikace ya kamata Musulmi ya bi sunnarsa, ya kiyaye koyarwarsa, ya yi koyi da halayensa kuma ya girmama umarninsa.
Dr. Abdallah ya yi kira ga Musulmi da su ƙara nazarin tarihin Annabi Muhammadu SAW domin fahimtar matsayinsa, kyawawan halayensa da irin ƙoƙarin da ya yi wajen isar da saƙon Allah.
“Shine mutum na farko da yazo da sallah da sauran hukunce hukuncen sharia mai sauki ga mutanansa, baya ga kuma shine farkon wanda zai fara keta kasa ya fito, wannan shine na farko da zai fara bude kofar Aljanna”
“Shine farkon wanda zai fara ceto a gobe kiyama, babu mai wannan darajar sama da Annabi Muhammadu SAW”
A karshen Hudubarsa yace ya rage ga jama’a su kara nazarin waye manzon tsira Annabi Muhammadu SAW domin sanin waye shi.
TST Hausa ta rawaito cewa yawancin mahalarta sallar juma’ar sun ta zubar da hawaye saboda tunasar da su falalar Annabi Muhammadu SAW.