Gwamnatin jihar Kano ta bayana shirinta na magance matsalar ruwan sha a Kano nan da watanni uku masu zuwa .
Kwamishinan ma’aikatar kula da albarkatun ruwa ta jihar Kano,Hon Umar Haruna Doguwa ya bayyana hakan a wata hira da manema labarai a ofishinsa ,kan Shirin da ma’aikatarsa tayiwa mutanan Kano a sabuwar shekarar 2025.
Haruna Doguwa ya shaida cewa , gwamnan jihar Kano Alhaji Abba Kabir Yusuf ya amince a samar da wasu manyan injunan tunkudo ruwa guda 10 da za’ayi amfani dasu a matatun ruwan da ake dasu na Chalawa da Tamburawa da Kusalla da Magaga.
Kwamishinan ya tabbatarwa da mutanan Kano cewa ,a wannan karon gwamnatin Kano da gaske take wajen ganin an wadata jama’a da ruwan sha a cikin birnin Kano da kewaye nan da watanni uku masu zuwa.
Yace gwamnatin Kanon ta kashe sama da naira miliyan dari 500 domin sayan manyan injunan turo ruwan daga kasahen waje.
Ya nemi al’umomin yankunan dake fama da matsalar ruwan , musamman Kurna da Fagge da Unguwa uku da cikin kwaryar birnin Kano dasu sha kuruminsu .
Doguwa yace da zuwansa a matsayin kwamishinan ruwa a Kano sai ya fara rangadin wuraren da ake da matsala dasu , musamman matatun ruwan sha.
Ya kuma jinjinawa tsohon kwamishinan ma’aikatar ruwan ta jihar Kano Hon. Ali Haruna Makoda akan jajircewar da yayi wajen tabbatar da shirin samar da ruwa a Kano lokacin yana ma’aikatar.
Ya nemi kanawa da su cigaba da yiwa gwamnatin kyakkyawar fahimta akan abinda duk tasa a gaba.