Kamfanin gidajen man fetur na MRS Oil Nigeria Plc ya bayyana cewa ya fara sayar da man fetur a kan farashin naira 739 kowacce lita a wasu daga cikin gidajen man fetur ɗinsa da ke sassa daban-daban na Najeriya.
Sanarwar, wadda ke yawo a kafafen sadarwa, ta nuna cewa matakin na da nufin kare masu saye daga sayan Fetur fiye da kima tare da tabbatar da samun man fetur mai inganci a farashi mai sauƙi.
KARIN LABARAI:https://tsthausa.com/rage-farashin-fetur-da-mukayi-shine-dalilin-sauke-farashin-a-najeriya-ba-janye-harajin-kaso-15-ba-matatar-dangote/
A cewar bayanin, kamfanin ya buƙaci jama’a da su kai rahoto idan suka ci karo da wani gidan man MRS da ke sayar da fetur sama da naira 739 kan lita, ta hanyar kiran lambar waya 0800 123 5264 da aka tanada domin hakan.
Sanarwar ta kuma bayyana cewa ƙarin gidajen man MRS za su shiga tsarin wannan farashi nan gaba kaɗan, lamarin da zai iya taimakawa wajen rage bambancin farashin fetur a kasuwanni daban-daban.
Sai dai, ba a fayyace ko farashin ya fara aiki a duk faɗin ƙasa lokaci guda ba, domin masana sun nuna cewa farashin fetur kan bambanta bisa la’akari da wurin da gidan mai yake, kuɗin jigila, da yanayin kasuwa.
KARIN LABARAI:https://tsthausa.com/dangote-ne-ya-rage-farashin-fetur-da-kaso-5-6-shi-ya-sa-farashi-ya-sauka-ba-saboda-janye-harajin-15-ba/
Matakin na zuwa ne a wani lokaci da ake ci gaba da hasashen cewa Matatar Dangote za ta taka muhimmiyar rawa wajen ƙara wadatar man fetur da kuma taimakawa rage tsadarsa a Najeriya.