A wani sabon gagarumin yunƙuri na ƙarfafa shirin siyasar jam’iyyar APC gabanin zaɓen shekarar 2027, gamayyar ƙungiyoyin goyon bayan jam’iyyar guda 1,500 da aka yi wa rajista sun amince da shiga sahun shirin Renewed Hope Network (TRN) na Sanata Abdul’aziz Yari kuma tsohon gwamnan jihar Zamafara.
Ƙungiyoyin sun bayyana TRN a matsayin ingantacciyar kafa da aka tsara domin wayar da kan jama’a, haɗa kan magoya baya, da kuma gina tubalin samun nasarar sake zaɓen Shugaban Ƙasa, Bola Ahmed Tinubu, a karo na biyu.
Wannan matsaya ta fito ne bayan wani muhimmin taro da aka gudanar a Abuja, kamar yadda wata sanarwa da Mataimakin Darakta Janar na gamayyar ƙungiyoyin, Dakta AK Peters, ya sanya wa hannu ta tabbatar.
KARIN LABARAI:https://tsthausa.com/shugabancin-tinubu-na-burge-mu-yan-najeriya-na-cikin-walwala-yanzu-in-ji-bankin-duniya/
A cewar sanarwar, TRN na ci gaba da samun karɓuwa mai faɗi a sassa daban-daban na ƙasar, sakamakon tsare-tsare da dabarun da aka shimfiɗa domin kai saƙon jam’iyya ga al’umma tun daga matakin tushe.
Sanarwar ta kuma nuna cewa shirin na karkashin jagorancin Kwamared Okpokwu Ogenyi, gogaggen mai wayar da kan jama’a na APC, tare da haɗin gwiwar Farfesa Tunji John Asaolu, fitaccen jami’in diflomasiyya, waɗanda ke taka muhimmiyar rawa wajen tafiyar da ayyukan TRN.
Sanata Abdul’aziz Yari, tsohon Gwamnan Jihar Zamfara kuma Sanata mai wakiltar Zamfara ta Yamma, shi ne jagoran da ke ɗaukar nauyin wannan shiri, wanda aka ƙaddamar domin ƙarfafa haɗin kai da kuma tattara goyon bayan jama’a a faɗin Najeriya.
A cikin matakan farko na aiwatar da shirin, TRN ta fara tattara bayanan wakilan jam’iyya a dukkan rumfunan zaɓe, da nufin gina tsari mai ɗorewa na hulɗa da masu jefa ƙuri’a da kuma inganta tsarin yaɗa saƙonni.
Dakta Peters ya bayyana wannan yunƙuri a matsayin abin a yaba, yana mai cewa TRN na ƙara samun karɓuwa a tsakanin ‘yan Najeriya a kowane yanki.
KARIN LABARAI:https://tsthausa.com/tinubu-tuntu%c9%93e-ya-yi-wanda-zai-iya-fadawa-kan-kowaamma-ba-faduwa-ya-yi-ba-in-ji-fadar-shugaban-kasa/
A cewarsa, “Mun himmatu wajen gina tsari mai ƙarfi tun daga tushe domin bai wa Shugaban Ƙasa cikakken goyon baya da zai tabbatar da nasara a zaɓen 2027.”
Ya ƙara da cewa jam’iyyar APC na da fiye da ƙungiyoyin goyon baya 3,500 da aka yi wa rajista, inda 1,500 daga cikinsu suka riga suka shiga TRN, yayin da ake sa ran sauran za su bi sahu nan gaba kaɗan, musamman kafin lokacin bukukuwan Easter.
A ƙarshe, ya jaddada cewa bisa la’akari da irin jagoranci, ƙwarewa da hangen nesa da Sanata Yari ke nunawa, TRN na zama wata babbar kafa da za ta taka muhimmiyar rawa wajen gina goyon bayan jama’a daga tushe, tare da ƙarfafa damar samun nasarar jam’iyyar APC a babban zaɓe mai zuwa.